ཕ་ཡུལ་དུ་བོད་ཡིག་དགེ་རྒན་བྱས་པའི་ལོ་ངོ་དེ་དག་གི་རིང་། ཁོ་རང་ལ་མུ་མཐུད་སློབ་སྦྱོང་བྱ་རྒྱུའི་འདུན་པ་དྲག་པོ་ཞིག་གིས་སྐུལ་ཏེ། སྤྱི་ལོ་ ༡༩༩༡ ལོར་ལན་ཀྲུའི་ནུབ་བྱང་མི་རིགས་སློབ་གྲྭ་ཆེན་མོའི་བོད་ཡིག་སྡེ་ཁག་ཏུ་བོད་ཀྱི་སྐད་ཡིག་དང་རྩོམ་རིག་གཉིས་ལ་ཉེ་བའི་གཙུག་ལག་རབ་འབྱམས་པ་བྱ་རྒྱུའི་རྒྱུགས་འཕྲོད་ནས་སློབ་ཆེན་དེ་རུ་སློབ་གཉེར་གནང་། དེ་ནས་ཁོང་ཡང་བསྐྱར་རང་གི་ཕ་ཡུལ་དུ་སོང་སྟེ་ལོ་ངོ་ལྔའི་རིང་མཚོ་ལྷོ་བོད་རིགས་རང་སྐྱོང་ཁུལ་སྲིད་གཞུང་ནང་ཕྱག་ལས་བསྒྲུབས་པ་དང་། རྗེས་སུ་སླར་ཡང་ནུབ་བྱང་མི་རིགས་སློབ་གྲྭ་ཆེན་མོར་ཕེབས་ནས་བོད་རྒྱ་ཡིག་སྒྱུར་ཐོག་གཙུག་ལག་རབ་འབྱམས་པའི་ཆེད་སྦྱོང་གནང་ཞིང་། ལོ་ངོ་གཉིས་ཀྱི་དུས་ཡུན་ཁོ་ན་ཙམ་ལ་བསླབ་གནས་བཞེས་ཐུབ་པ་བྱུང་ཡོད།
སྤྱི་ལོ་ ༡༩༩༤ ལོར་པད་མ་ཚེ་བརྟན་ལགས་ཀྱིས་བོད་ལུགས་སྨན་པ་ཡིན་པའི་བོད་མོ་གཡུ་སྒྲོན་མཚོ་ལགས་དང་ལྷན་དུ་འཇིག་རྟེན་མཐུན་འཇུག་གི་གཉེན་སྒྲིག་བྱས་ནས། སྤྱི་ལོ་ ༡༩༩༧ ལོར་ཁོང་གཉིས་ལ་འཇིགས་མེད་འཕྲིན་ལས་ཞེས་པའི་བུ་ཞིག་བཙས་པ་དང་། ཁོང་གིས་ཀྱང་རང་གི་ཕ་བཞིན་ད་ལྟ་གློག་བརྙན་འཁྲབ་ཁྲིད་པའི་བྱ་བ་གཉེར་བཞིན་ཡོད།
པད་མ་ཚེ་བརྟན་གྱིས་བོད་ཀྱི་རྩོམ་རིག་ཐོག་བཞག་པའི་ཕྱག་རྗེས།
པད་མ་ཚེ་བརྟན་ལགས་ཆུང་དུས་ནས་རྩོམ་རིག་དང་གློག་བརྙན་སོགས་སྒྱུ་རྩལ་དང་འབྲེལ་བའི་ལས་རིགས་ལ་དོ་སྣང་ཆེ་ཞིང་། སྐབས་ཤིག་ལ་ཁོ་རང་ཕ་ཡུལ་དུ་གཞི་རིམ་འགྲིམས་དུས། ས་གནས་སྲིད་གཞུང་གི་བཀོད་སྒྲིག་འོག་ཅར་ལི་ཆེབ་ལིན་གྱི་དགོད་བྲོའི་གློག་བརྙན་ཞིག་བལྟ་རྒྱུའི་གོ་སྐབས་བྱུང་བ་དེ་ཡིས་རྗེས་སོར་ཁོང་ལ་སོ་སོའི་བསམ་བློ་མཚོན་པའི་གཏམ་རྒྱུད་བཤད་རྒྱུ་དང་། སྒྱུ་རྩལ་གྱི་ལམ་བུ་དེའི་ཐོག་མུ་མཐུད་བསྐྱོད་རྒྱུར་བག་ཆགས་ཟབ་མོ་ཞིག་བཞག་ཐུབ་པ་བྱུང་ཡོད།
སྤྱི་ལོ་ ༡༩༩༠ ལོའི་འགོ་སྟོད་ཙམ་ནས་ཁོང་གིས་ཐོག་མར་བོད་ཡིག་དང་དེ་ནས་རྒྱ་ཡིག་ཐོག་སྒྲུང་ཐུང་སོགས་བྲིས་ཏེ་རྩོམ་པ་པོ་ཞིག་གི་ལམ་བུའི་སྟེང་གོམ་པ་ཐོག་མ་སྤོས་ཤིང་། རྗེས་སོར་ནུབ་བྱང་མི་རིགས་སློབ་གྲྭ་ཆེན་མོར་ཉེ་བའི་གཙུག་ལག་རབ་འབྱམས་པའི་སློབ་གཉེར་གནང་སྐབས། << མི་དང་ཁྱི >> ཞེས་པའི་སྒྲུང་རྩོམ་ཞིག་བོད་ཀྱི་རྩོམ་རིག་སྒྱུ་རྩལ་དུས་དེབ་དང་། སྤྱི་ལོ་ ༡༩༩༤ ལོར་མཚོ་སྔོན་མང་ཚོགས་སྒྱུ་རྩལ་དུས་དེབ་སྟེང་དུ་<< བརྩམས་སྒྲུང་ཞིག་དང་དེའི་མཇུག་བསྡུ་ཚུལ་གཉིས >> ཞེས་པའི་སྒྲུང་ཐུང་གཅིག་དང་། ལྷག་པར་དུ། ལོ་གཉིས་རྗེས་ཡང་བསྐྱར་<< ཁ་བ་མེད་པའི་དགུན་ཁ >>ཟེར་བའི་བརྩམས་སྒྲུང་ཞིག་དུས་དེབ་དེའི་རྩོམ་སྒྲིག་པ་རང་སྒྲའི་རོགས་དན་འོག་འདོན་སྤེལ་བྱེད་ཐུབ་པ་བྱུང་ཡོད།
ཁོང་ཉིད་རྩོམ་རིག་སྒྱུ་རྩལ་གྱི་ལམ་བུ་དེར་མུ་མཐུད་རྡོག་ཐོན་གྱིས་སྒྲུང་རྩོམ་གཙོ་བོར་བྱས་པའི་བརྩམས་ཆོས་མང་པོ་ཞིག་བརྩམས་ཡོད་པ་དང་། དེའི་གྲས་ནས་སྒྲུང་ཐུང་ཕལ་ཆེ་བ་ཞིག་ལ་སྒྱུ་འཕྲུལ་དངོས་ཡོད་རིང་ལུགས་ཀྱི་འབྲི་སྲོལ་སྤྱད་ཡོད། ང་ཚོས་དོ་སྣང་བྱེད་འོས་པའི་ཁོང་གི་བརྩམས་ཆོས་སྐོར་ཞིག་ནི། << གངས་ >> དང་ << ཡུལ་གྱར་རྡུང་ལེན་པ་ཞིག་གི་རྨི་ལམ >> << ཨ་ཁུ་ཐོད་པ་ལ་བཅར་འདྲིར་ཕྱིན་པ >> << རྩྭ་ཐང >> << གྲོང་ཁྱེར་གྱི་འཚོ་བ >> << སེམས་ནད >> << སློང་མོ་བ >> << སྐེ་དཀྲིས་དམར་པོ >> << ཨོ་རྒྱན་གྱི་སོ >> << ཐར་ལོ >> སོགས་ཡིན་ཞིང་། རྗེས་ལ་ཁོང་གིས་བྲིས་པའི་བརྩམས་སྒྲུང་མང་པོ་ཞིག་ཕྱོགས་གཅིག་ཏུ་བསྡུས་པའི་དེབ་གསུམ་ཐོན་ཡོད། དེ་དག་ལས་ << བསླུ་བྲིད >> ཅེས་པ་སྤྱི་ལོ་ ༢༠༠༩ ལོར་མཚོ་སྔོན་མི་རིགས་དཔེ་སྐྲུན་ཁང་གིས་དུས་རབས་ཉི་ཤུ་རྩ་གཅིག་པའི་བོད་ཀྱི་རྩོམ་པ་པོའི་དེབ་ཕྲེང་གི་ཁོངས་སུ་དཔར་སྐྲུན་དང་། ཁོང་གི་བརྩམས་སྒྲུང་ཕྱོགས་བསྒྲིགས་ཀྱི་དེབ་ << གྲོང་ཁྱེར་གྱི་འཚོ་བ >> ཞེས་པ་ ༢༠༡༢ ལོར་བོད་ལྗོངས་མི་དམངས་དཔེ་སྐྲུན་ཁང་གིས་དཔར་སྐྲུན་དང་། ༢༠༡༨ ལོར་ << པད་མ་ཚེ་བརྟན་གྱི་སྒྲུང་ཐུང་ཕྱོགས་བསྒྲིགས >> ཞེས་པའི་དེབ་གཅིག་དཔར་སྐྲུན་འགྲེམས་སྤེལ་བྱས་ཡོད།
ཁོང་གི་སྒྲུང་ཐུང་གྲགས་ཆེ་བ་མང་པོ་ཞིག་དབྱིན་ཡིག་དང་རྒྱ་ཡིག ཧྥ་ཡིག་དང་འཇར་མན། སི་པན་དང་ཉི་ཧོང་སྐད། ཀོ་ར་ཡན་དང་ཅེག་སྐད་སོགས་ལ་བསྒྱུར་ཡོད་པ་དང་། དོ་སྣང་བྱེད་འོས་པ་ཞིག་ལ། ༢༠༡༨ ནས་བཟུང་སྟེ་ཁོང་གི་བརྩམས་སྒྲུང་རྣམས་ཕྱོགས་བསྒྲིགས་ཀྱིས་ << བསླུ་བྲིད བོད་ནང་གི་སྒྲུང་རྩོམ >> ཟེར་བའི་དབྱིན་འགྱུར་མའི་དེབ་ཅིག་པེཊི་ཤི་ཡ་ལྦེ་ད་ནི་ལགས་ (Patricia Schiaffini- Vedani) དང་མ་ཡི་ཀལ་མོན་ཧར་དྲ། (Michael Monhart) རྣམ་གཉིས་ནས་འདོན་སྤེལ་བྱེད་འགོ་བཙུགས་ཤིང་། ཁོང་གི་རྩོམ་ཡིག་ལ་རྒྱལ་སྤྱིའི་ཁྱོན་ཡོངས་ནས་བལྟ་ཀློག་བྱེད་མཁན་གྱི་ཁོར་ཡུག་རྒྱ་ཆེ་རུ་ཕྱིན་ཡོད།
ཁོང་གིས་བྲིས་པའི་བརྩམས་སྒྲུང་ << བསླུ་བྲིད >> དང་ << གངས >> ད་དུང་ << ཨོ་རྒྱན་གྱི་སོ >> དང་ << གྲོང་ཁྱེར་གྱི་འཚོ་བ >> སོགས་ནི། བོད་ནང་དང་རྒྱ་ནག རྒྱལ་སྤྱིའི་ཁྱོན་ཡོངས་ནས་གདེངས་འཇོག་ཆེན་པོ་ཐོབ་པའི་འཐུས་ཚབ་རང་བཞིན་གྱི་བརྩམས་ཆོས་སྐོར་ཞིག་ཆགས་ཀྱི་ཡོད་པ་དང་། བརྩམས་སྒྲུང་དེ་དག་གིས་རིག་གཞུང་གཅིག་པ་ཡིན་མིན་ལ་མ་ལྟོས་པར་ཀློག་མཁན་ཚོར་བག་ཆགས་ཟབ་མོ་ཞིག་བཞག་ཐུབ་པ་བྱུང་ཡོད།
བོད་པ་ཞིག་གློག་བརྙན་བཟོ་སྐྲུན་གྱི་ལས་ལ་འཇུག་སྟངས།
སྤྱི་ལོ་ ༢༠༠༠ ལོར། པད་མ་ཚེ་བརྟན་ལགས་ཀྱིས་ནུབ་བྱང་མི་རིགས་སློབ་གྲྭ་ཆེན་མོ་རུ་བོད་ཀྱི་རྩོམ་རིག་ཐོག་གཙུག་ལག་རབ་འབྱམས་པའི་སློབ་གཉེར་བྱེད་བཞིན་པའི་སྐབས། རང་དང་སྡེ་ཁག་གཅིག་པའི་སློབ་གྲོགས་གངས་ཞུན་(གངས་བཞུགས་ཀྱང་ཟེར། ) དང་ཕན་ཚུན་ངོ་ཤེས་སུ་གྱུར་ཞིང་། རྗེས་སོར་ཁོང་(གངས་ཞུན་) མཐོ་སློབ་མཐར་ཕྱིན་ཏེ་ཟི་ལིང་དུ་ཡོད་པའི་ཀུན་ཕན་ཐེབས་རྩ་ཚོགས་པར་བྱ་བའི་ལས་གནས་ཐོབ་ཡོད། སྐབས་དེ་དུས་པད་མ་ཚེ་བརྟན་གྱིས་གྲོགས་པོ་གངས་ཞུན་བརྒྱུད་ཀུན་ཕན་ཐེབས་རྩ་ཚོགས་པས་གློག་བརྙན་སྦྱང་རྒྱུར་སློབ་ཡོན་གྱི་མཐུན་རྐྱེན་སྦྱོར་སྤྲོད་བྱེད་ཀྱི་ཡོད་པ་ཤེས་ཏེ། རྗེས་སོར་པད་མ་ཚེ་བརྟན་ལགས་ལ་མིང་གྲགས་ཆེ་བའི་པེ་ཅིང་གློག་བརྙན་སློབ་གླིང་དུ་ (Beijing Film Academy) གློག་བརྙན་འཁྲབ་ཁྲིད་པ་དང་འཁྲབ་གཞུང་འབྲི་རྩོམ་གྱི་ཆེད་སྦྱོང་ཐོག་ཀུན་ཕན་ཐེབས་རྩ་ཚོགས་པའི་སློབ་ཡོན་ཐོབ་ཐུབ་པ་བྱུང་ཡོད། ཁོ་རང་ཐེངས་དང་པོར་གློག་བརྙན་བཟོ་སྐྲུན་གྱི་ལས་ལ་འཇུག་གི་ཡོད་པའི་ཆ་ནས། སློབ་ཡོན་དེ་ནི། ཁོའི་མི་ཚེའི་མདུན་ལམ་གྱི་དཀྱོག་མཚམས་གལ་ཆེན་ཞིག་ཆགས་ཀྱི་ཡོད་ལ། ཚོགས་པ་དེ་ཡིས་ཁོའི་གློག་བརྙན་བཟོ་སྐྲུན་གྱི་འགྲུལ་བཞུད་ལ་རྒྱབ་སྐྱོར་ཆེན་པོ་བྱས་ཡོད་པ་དེ་སྔ་ཁོང་གིས་ཀྱང་གསུངས་མྱོང་།
༢༠༠༤ ཡི་ལོ་མཇུག་ཙམ་ལ། གངས་ཞུན་དང་མི་གཞན་སྐོར་ཞིག་གིས་མཉམ་འབྲེལ་སྒོས་ ‘ཧི་མ་ལ་ཡ་རིག་གནས་སྒྱུ་རྩལ་ཚད་ཡོད་ཀུང་སི་’ཞེས་པ་ཞིག་ཐོག་མར་གསར་འཛུགས་དང་། ཚོགས་པ་འདི་དང་རྗེས་སུ་ ‘མ་ཎི་རྡོ་འབུམ་གློག་བརྙན་ལས་ཁུངས་’ གཉིས་བརྒྱུད་ནས་པད་མ་ཚེ་བརྟན་གྱི་གློག་བརྙན་མང་དག་ཅིག་དང་ད་ལྟ་ཚང་མས་དོ་སྣང་བྱེད་ཡུལ་དུ་གྱུར་པའི་ཁོང་གི་གློག་བརྙན་<< ལྷིང་འཇགས་ཀྱི་མ་ཎི་རྡོ་འབུམ >> དང་ << ཁྱི་རྒན >> << ཐར་ལོ >> << ལག་དམར[1] >> སོགས་རྒྱ་ཆེའི་གཟིགས་མོ་བའི་སྤྱན་ལམ་དུ་བསྟར་ཐུབ་པ་བྱུང་ཡོད་པས། པད་མ་ཚེ་བརྟན་དང་ཚོགས་པ་དེ་ཡི་ཐུན་མོང་གི་མཉམ་འབྲེལ་ལ་བརྟེན་ནས་ཁོང་གི་གློག་བརྙན་བཟོ་སྐྲུན་གྱི་བྱ་གཞག་ལ་རྒྱ་ཁྱབ་རང་བཞིན་ལྡན་པའི་གྲུབ་འབྲས་ཐོབ་ཐུབ་པ་བྱུང་ཡོད།
༢༠༠༤ ལོར། པད་མ་ཚེ་བརྟན་ལགས་ཀྱིས་མཐོ་སློབ་ཀྱི་གློག་བརྙན་དུས་སྟོན་ཆེད་དུ་བཟོས་པའི་གློག་བརྙན་ << རྩྭ་ཐང >> ཞེས་པ་ནི་ཁོང་གི་གློག་བརྙན་ཐོག་མ་དེ་ཆགས་ཀྱི་ཡོད། སྐར་མ་སུམ་ཅུ་ཅན་གྱི་གློག་བརྙན་ཐུང་གྲས་དེ་ནི་དེ་སྔ་ཁོང་གིས་བྲིས་པའི་བརྩམས་སྒྲུང་ཞིག་ལ་གཞི་བཅོལ་ཞིང་དེའི་ཁ་བྱང་ཡང་གློག་བརྙན་དང་གཅིག་མཚུངས་ཡིན། གློག་བརྙན་དེའི་ནང་འབྲོག་པ་རྒན་རྒོན་གཉིས་ཀྱིས་ཚེ་ཐར་བཏང་བའི་གཡག་བོར་བརླག་ཏུ་སོང་རྐྱེན། ཁོང་གཉིས་ཀྱིས་དེ་རྩད་འཚོལ་དང་འབྲེལ་བའི་གཏམ་རྒྱུད་ཅིག་གློག་བརྙན་གྱི་བརྗོད་སྙིང་གཙོ་བོ་རུ་བཟུང་ཡོད།
ཡང་ ༢༠༠༥ ལོར། ཁོང་གིས་འབྲི་རྩོམ་དང་ཕབ་སྐྲུན་བྱས་པའི་གློག་བརྙན་ << ལྷིང་འཇགས་ཀྱི་མ་ཎི་རྡོ་འབུམ >> ཞེས་པ་ནི་པད་མ་ཚེ་བརྟན་གྱི་གཏམ་རྒྱུད་གློག་བརྙན་( Feature Film ) ཐོག་མ་དེ་ཡིན་ཞིང་། གློག་བརྙན་དེ་ཡང་ཁོང་གིས་སྔོན་མ་བྲིས་ཟིན་པའི་བརྩམས་སྒྲུང་ཞིག་ལས་བཅོས་སྒྲིག་བྱས་པ་ཞིག་ཡིན། གློག་བརྙན་དེའི་ནང་རང་ལོ་བཅུ་ལ་སོན་པའི་བན་ཆུང་ཞིག་ལོ་གསར་གཏོང་ཆེད་དགོན་པ་ནས་ཕྱིར་རང་གི་ཕ་ཡུལ་ལ་ལོག་པའི་གཏམ་རྒྱུད་ཅིག་བརྗོད་ཡོད་དེ། ས་ཐག་རིང་པོ་ཞིག་ནས་རྟའི་ཐོག་འགྲུལ་བཞུད་བྱས་ཚར་བའི་རྗེས་སུ་ཁོ་རང་གཞི་ནས་རང་གི་ཕ་ཡུལ་དུ་འབྱོར་ཞིང་། དེར་རང་ཁྱིམ་ལ་གསར་དུ་ཉོས་པའི་བརྙན་འཕྲིན་དང་དེའི་ནང་གི་ནུབ་ཕྱོགས་སུ་བསྐྱོད་པའི་རྣམ་ཐར་གཉིས་ཀྱིས་ཁོ་རང་གི་ཡིད་དབང་ཅིག་ཅར་དུ་འཕྲོག་པའི་ངང་ཚུལ། ད་དུང་། ཡུལ་མི་ཚོས་ལོ་གཅིག་གི་བྱེད་སྒོའི་ཚུལ་དུ་སྤེལ་བཞིན་པའི་ཨ་ཅེ་ལྷ་མོའི་འཁྲབ་སྟོན་གྱི་རྣམ་པ་སོགས་མདོ་དོན་བོད་པ་རང་གི་འཁྲབ་གཞུང་རྩོམ་སྒྲིག་དང་འཁྲབ་སྟོན་པ་ཚང་མ་བོད་རིགས་ཡིན་པའི་(གློག་བརྙན་འདིའི་ནང་གི་མི་སྣ་མང་པོ་ཞིག་གློག་བརྙན་འཁྲབ་སྟོན་གྱི་ཆེད་སྦྱོང་དང་ཉམས་མྱོང་མེད་པའི་བོད་རིགས་ཤ་སྟག་ཡིན།) པད་མ་ཚེ་བརྟན་གྱི་གློག་བརྙན་འདི་ཡིས་རྒྱ་ནག་གི་ཤུགས་རྐྱེན་འོག་འཕོ་འགྱུར་འགྲོ་བཞིན་པའི་སྲོལ་རྒྱུན་དང་དེང་རབས་གཉིས་དབར་གྱི་སྣོལ་མཚམས་ཤིག་གསལ་སྟོན་བྱས་ཡོད། གློག་བརྙན་འདི་ནི་བོད་ནང་ནས་ཕྱི་ཕྱོགས་སུ་ཁྱབ་བརྡལ་ཕྱིན་པའི་གློག་བརྙན་ཐོག་མའི་གྲས་ཡིན་པས། གློག་བརྙན་དེ་ཡི་སྙན་གྲགས་དང་གྲུབ་འབྲས་ལ་བརྟེན་ནས་པད་མ་ཚེ་བརྟན་ཞེས་པའི་མིང་དེ་རྒྱལ་སྤྱིའི་སྤྱི་ཚོགས་ནང་ཐོག་མར་ངོ་འཕྲོད་པ་བྱུང་ཡོད།
༢༠༠༥ དང་ ༢༠༠༦ གི་ལོར་ཁོང་གི་གཏམ་རྒྱུད་གློག་བརྙན་ << ལྷིང་འཇགས་ཀྱི་མ་ཎི་རྡོ་འབུམ >> དེ་རྒྱལ་སྤྱིའི་གློག་བརྙན་གྱི་དུས་སྟོན་མང་པོའི་བྱ་དགའི་འོས་གཞིའི་ནང་འདེམས་སྒྲུག་དང་ཕུལ་བྱུང་བྱ་དགའ་ཐེངས་མང་ཐོབ་ཡོད་པ་དཔེར་ན། རྒྱ་ནག་ནང་ཨ་རིའི་ཨོསྐིར་བྱ་དགའ་དང་གཅིག་མཚུངས་ལྟར་རྩི་བཞིན་པའི་གསེར་བྱ་རྟགས་ཅན་གྱི་གློག་བརྙན་གཟེངས་རྟགས་སྐབས་ཉི་ཤུ་རྩ་ལྔ་པར་( Twenty-Fifth Golden Rooster Awards ) པད་མ་ཚེ་བརྟན་ལ་ གློག་བརྙན་འཁྲབ་ཁྲིད་པ་ཐོག་མའི་ཕུལ་བྱུང་བྱ་དགའ་དང་། ལྷོ་ཀོ་རི་ཡའི་སྦུ་སན་རྒྱལ་སྤྱིའི་གློག་བརྙན་དུས་སྟོན་ཐེངས་བཅུ་བའི་ (Busan International Film Festival ) ཕུལ་བྱུང་གློག་བརྙན་བྱ་དགའ། (New Current Award)[2] ཁྲང་ཁྲུན་གློག་བརྙན་དུས་སྟོན་སྐབས་བརྒྱད་པའི་འཁྲབ་ཁྲིད་པ་ཕུལ་བྱུང་གི་བྱ་དགའ་དང་པེ་ཅིང་སློབ་ཆེན་སློབ་མའི་གློག་བརྙན་དུས་སྟོན་སྐབས་བཅུ་གསུམ་པའི་གློག་བརྙན་ཡག་ཤོས་ཐོག་མའི་བྱ་དགའ་སོགས་ཐོབ་ཡོད།
པད་མ་ཚེ་བརྟན་ལགས་པེ་ཅིང་གློག་བརྙན་སློབ་གླིང་དུ་འཁྲབ་གཞུང་རྩོམ་སྒྲིག་དང་འཁྲབ་ཁྲིད་པའི་ཆེད་སྦྱོང་གནང་ཚར་རྗེས་སློབ་གླིང་དེ་ག་རང་དུ་ལོ་གཅིག་རིང་སློབ་སྦྱོང་འཕར་མ་བྱས་པ་དང་། དེའི་རྗེས་ ༢༠༠༩ ལོར་ཁོང་གི་གློག་བརྙན་ << འཚོལ >> ཞེས་པ་རྒྱ་ཆེའི་གཟིགས་མོ་བའི་སྤྱན་ལམ་དུ་བསྟར་ཡོད། གློག་བརྙན་དེའི་ནང་རྒྱལ་བུ་དྲི་མེད་ཀུན་ལྡན་གྱི་རྣམ་ཐར་གཞི་ལ་བཅོལ་བའི་གློག་བརྙན་ཞིག་བཟོ་འཆར་དང་འབྲེལ་ནས་འཁྲབ་སྟོན་པ་འཚོལ་བསྡུ་སླད། ཨ་མདོའི་ས་ཁུལ་མང་པོར་ལྟ་སྐོར་བྱེད་བཞིན་པའི་གློག་བརྙན་འཁྲབ་ཁྲིད་པ་དང་ཁོང་གི་ཕྱག་རོགས། ཚོང་པ་གསུམ་གྱི་སྐབས་དེའི་མཐོང་ཐོས་མྱོང་ཚོར་རྣམས་གསལ་སྟོན་བྱས་ཡོད་པས། གློག་བརྙན་དེ་བེང་ཀོག་རྒྱལ་སྤྱིའི་གློག་བརྙན་དུས་སྟོན་སྐབས་བདུན་པ་ ( Bangkok International Film Festival ) དང་། ལྦར་སོ་རྒྱལ་སྤྱིའི་གློག་བརྙན་དུས་སྟོན་( Warsaw International Film Festival ) ཐེངས་ཉི་ཤུ་རྩ་ལྔ་པ། ལོན་ཀྲོན་རྒྱལ་སྤྱིའི་གློག་བརྙན་དུས་སྟོན་ ( London International Film Festival )ཐེངས་ལྔ་བཅུ་ང་གསུམ་པ་སོགས་རྒྱལ་སྤྱིའི་གློག་བརྙན་དུས་སྟོན་མང་པོ་ཞིག་གི་བྱ་དགའི་འོས་མིང་ནང་ཚུད་ཐུབ་པ་བྱུང་ཡོད།
པད་མ་ཚེ་བརྟན་ལ་བོད་རང་གི་ངག་རྒྱུན་རྩོམ་རིག་དང་ཡུལ་སྲོལ་རིག་གནས་སོགས་ཀྱིས་བག་ཆགས་ཟབ་མོ་བཞག་ཡོད་ཙང་། ཁོང་གིས་བཟོས་པའི་གློག་བརྙན་དེ་ཚོར་བོད་མིའི་མངོན་རྟགས་ཆེས་འབུར་དུ་ཐོན་ཡོད། དཔེར་ན། གློག་བརྙན་<< ལྷིང་འཇགས་ཀྱི་མ་ཎི་རྡོ་འབུམ >> དང་ << འཚོལ >> ལྟ་བུར་མཚོན་ན། གློག་བརྙན་འདི་གཉིས་ཀྱི་རྒྱུ་ཆ་མང་པོ་ཞིག་ཁོང་རང་ཉིད་ནར་སོན་པའི་དུས་སྐབས་ནས་ཐོས་མྱོང་ཡོད་པའི་གེ་སར་གྱི་སྒྲུང་དང་ལྷ་མོའི་ཟློས་གར། ནང་ཆོས་དང་འབྲེལ་བའི་སྒྲུང་དང་བོད་མི་རང་གི་དམངས་ཁྲོད་སྒྲུང་གཏམ་གྲགས་ཅན་མི་རོ་རྩེ་སྒྲུང་སོགས་དང་འབྲེལ་ནས་ཡོད་པས། གནས་སྟངས་དེ་ཚོས་ཁོང་གི་བསམ་བློ་གཏོང་ཕྱོགས་ལ་ཤུགས་རྐྱེན་ཟབ་མོ་ཞིག་བཞག་ཡོད་ཅིང་། གོང་བརྗོད་གློག་བརྙན་དེ་གཉིས་ཀྱི་བརྗོད་དོན་མང་པོ་ཞིག་ཀྱང་རྒྱལ་བུ་དྲི་མེད་ཀུན་ལྡན་གྱི་རྣམ་ཐར་ལས་བླངས་ཡོད། << འཚོལ >> ལྟ་བུར་མཚོན་ན། གློག་བརྙན་དེ་བཟོ་རྒྱུའི་ཐོག་མའི་བསམ་བློ་ནི་ལོ་མང་སྔོན་ཁོང་ལ་ཐུག་པའི་ཚོང་པ་ཞིག་གིས་བཤད་པའི་བརྩེ་དུངས་ཀྱི་གཏམ་རྒྱུད་ཅིག་ལས་བྱུང་བ་ཡིན་ཞིང་། རྗེས་སོར་མི་དེ་ག་རང་ཁོང་གིས་<< འཚོལ >> གློག་བརྙན་གྱི་འཁྲབ་སྟོན་པའི་མི་སྣར་འདེམས་སྒྲུག་བྱས་ཡོད། << འཚོལ >> ཞེས་པའི་གློག་བརྙན་དེ་བཟོས་པའི་བརྒྱུད་རིམ་ཁྲོད་པད་མ་ཚེ་བརྟན་དང་ལས་རོགས་ཚོར་རྒྱལ་བུ་དྲི་མེད་ཀུན་ལྡན་གྱི་རྣམ་ཐར་དང་འདྲ་བར་རང་གི་ཆུང་མ་བློས་གཏོང་ཕོད་པའི་སྡེ་བའི་རྒན་པོ་ཞིག་དངོས་སུ་ཐུག་ཡོད་པ་རེད།
གོང་བརྗོད་གློག་བརྙན་དེ་གཉིས་ཆར་བལྟས་ན། པད་མ་ཚེ་བརྟན་གྱི་བརྙན་རིས་མཚོན་ཐབས་ཐད་ལ་བོད་ཀྱི་སྲོལ་རྒྱུན་ཐང་ཀའི་རི་མོའི་ཤུགས་རྐྱེན་ཟབ་མོ་ཐེབས་ཡོད་ཅིང་ཁོང་ལ་བཅར་འདྲི་དང་ཕན་ཚུན་གླེང་མོལ་བྱས་པ་དེ་དག་གི་ནང་ལའང་པད་མ་ཚེ་བརྟན་གྱིས་གསོན་ཉམས་དོད་པའི་ཐང་ཀའི་རི་མོའི་སྣང་བརྙན་དེ་ཚོའི་སྐོར་ཐེངས་མང་གསུངས་མྱོང་། དམིགས་བསལ་ཐང་ཀའི་རས་གཞི་གཅིག་གི་ནང་དུ་སྟོན་པའི་མཛད་རྣམ་ཆ་ཚང་བརྗོད་ཐུབ་པའི་སྒྱུ་རྩལ་གྱི་མཚོན་ཐབས་སམ་ཐབས་ལམ་དེར། ཁོ་རང་ལ་བློ་སྐྱེད་ཆེན་པོ་ཐོབ་ནས་རྗེས་སོར་ཁོང་གིས་བཟོས་པའི་གློག་བརྙན་དེ་ཚོར། བརྙན་མིག་དང་འཁྲབ་སྟོན་པའི་མི་སྣ། དེའི་འཚོ་སའི་ཁོར་ཡུག་གསུམ་གྱི་དབར་ལ་བར་ཐག་ངེས་ཅན་ཞིག་བཞག་པའི་ཐོག་ནས་བརྙན་ལེན་གྱི་རྒྱང་ཚད་རིང་པོར་སྤྱོད་པའི་རིག་ལམ་དེ་སྤྱད་ཡོད་ཅིང་། བརྙན་རིས་ཀྱི་མཚོན་ཐབས་དེ་ལ་བརྟེན་ནས་ཁོང་གིས་འཁྲབ་སྟོན་པའི་མི་སྣའི་བཞིན་གྱི་རྣམ་འགྱུར་དང་བྱ་སྤྱོད་སོགས་ལས་འདས་ཏེ། དེའི་འཚོ་སའི་ཁོར་ཡུག་གི་རྣམ་པ་འབུར་དུ་ཐོན་པའི་བོད་ཀྱི་དེང་རབས་སྤྱི་ཚོགས་ཀྱི་སྣང་བརྙན་གསར་བ་ཞིག་བཞེངས་སྐྲུན་བྱས་ཡོད། ཁོར་ཡུག་གི་བཀོད་པ་ཆ་ཚང་ལེན་པའི་བརྙན་སྒྲོམ་ཞིག་གི་ནང་ཇེ་ཆུང་དུ་ཕྱིན་པའི་མི་སྣའི་སྣང་བརྙན་ཚང་མ་ཚུད་ཐུབ་པའི་རྒྱང་ཐག་རིང་བོའི་བརྙན་ལེན་སྟངས་དེ་ཡིས། མ་གཞི་ནས་ང་ཚོའི་སེམས་ནང་བོད་ཀྱི་སྲོལ་རྒྱུན་མཛེས་དཔྱོད་ཀྱིས་སྤུད་པའི་ཐང་ཀའི་རི་མོའི་སྣང་བརྙན་ཞིག་རང་བཞིན་གྱིས་ཤར་དུ་བཅུག་ཡོད།
པད་མ་ཚེ་བརྟན་གྱིས་གློག་བརྙན་ཐོག་མ་བཟོ་དུས་ནས་གཞི་རྩའི་གནད་དོན་མང་པོ་ཞིག་ལ་མནོ་བསམ་བཞེས་ཡོད་ལ། རྗེས་སོར་ཐབས་ལམ་དེ་དག་ཁོང་གི་གློག་བརྙན་བཟོ་སྐྲུན་གྱི་གྲུབ་ཆའམ་ཆ་ཤས་གལ་ཆེན་ཞིག་ཏུ་གྱུར་ཡོད། ཁོང་གིས་གློག་བརྙན་དེ་ཚོར་བོད་ཀྱི་དེང་རབས་སྤྱི་ཚོགས་ཀྱི་རྣམ་པ་ཞིག་གསལ་སྟོན་བྱེད་ཀྱི་ཡོད་དུས། གློག་བརྙན་གྱི་བརྙན་མིག་གཏོད་ས་དང་འཁྲབ་སྟོན་པ་དག་བོད་པ་རང་གི་ཁོར་ཡུག་དང་མི་རྣམས་བདམས་གསེས་དང་། དམིགས་བསལ་ཁོང་གིས་གློག་བརྙན་ནང་འཁྲབ་སྟོན་པའི་ཆེད་སྦྱོང་སོགས་གང་ཡང་མ་ཐོབ་པའི་བོད་མི་མང་པོ་ཞིག་འདེམས་སྒྲུག་བྱས་ཡོད་པ་ནི། ཁོང་གི་བསམ་ཚུལ་ལྟར་ན། གློག་བརྙན་འཁྲབ་སྟོན་གྱི་ཆེད་སྦྱོང་སོགས་གང་ཡང་མ་ཐོབ་པའི་བོད་མི་དེ་ཚོའི་བསམ་བློའི་ཟབ་ཚད་དང་འཇིག་རྟེན་གྱི་ལྟ་ཚུལ། འཚོ་བའི་མྱོང་སྣང་དང་རིག་གནས་ཀྱི་བག་ཆགས་སོགས་ས་ཆ་གཞན་ཞིག་གི་ནང་འཚར་ལོངས་བྱུང་བའི་འཁྲབ་སྟོན་ཆེད་ལས་པ་ཞིག་གིས་བསྡུར་ཐབས་ཡེ་ནས་མེད་པར་དགོངས་ཀྱི་ཡོད་ལ། ཁོང་གིས་གློག་བརྙན་གྱི་བརྡ་ཆད་གཙོ་བོ་དེ་བོད་སྐད་རང་སྤྱོད་རྒྱུ་གཙོ་འདོན་བཟུང་ཡོད།
གོང་དུ་གློག་བརྙན་དེའི་ནང་གླེང་བཞིན་པའི་ཕྱིའི་གནོན་ཤུགས་དེ་ག་རང་གིས་ཁོང་གི་གློག་བརྙན་ཕབ་སྐྲུན་གྱི་ལས་གཞི་ལ་དོ་ཕོག་ཤུགས་ཆེན་བཟོས་ཡོད་པ་ནི། རྒྱ་ནག་གཞུང་ནས་གློག་བརྙན་ཕབ་སྐྲུན་གྱི་ཆོག་མཆན་ཕར་འགྱངས་དང་། གློག་བརྙན་དེའི་ཆེད་དུ་བདམས་པའི་ཁྱི་རྒན་ཤི་བ། ས་གནས་སྲིད་གཞུང་ནས་ལམ་ཁ་བསྐྱར་གསོ་བྱ་རྒྱུའི་ལས་དོན་ལ་ཁ་གཡར་ནས་བརྙན་ལེན་བྱ་སའི་ས་ཚིགས་ (ཁང་པ་) གཏོར་སྐྱོན་ཐེབས་པ་སོགས་ཁོང་ལ་དཀའ་ངལ་མང་པོ་ཞིག་ཕྲད་ཡོད། རྗེས་སོར་གོང་རིམ་ནས་གློག་བརྙན་ཕབ་སྐྲུན་བྱ་རྒྱུར་ཆོག་མཆན་ཐོབ་དུས། པད་མ་ཚེ་བརྟན་གྱིས་བརྙན་ལེན་ས་ཚིགས་དང་ཁྱི་རྒན་གསར་པ་ཞིག་འཚོལ་དགོས་བྱུང་ཡོད་ལ། དམིགས་བསལ་གློག་བརྙན་( ཁྱི་རྒན་ ) དེའི་ཆེད་དུ་ཁོང་གིས་དེ་སྔོན་རིག་གནས་གསར་བརྗེ་ཡི་ལས་འགུལ་སྤེལ་ས་དང་ད་ལྟ་བསྐྱར་སྐྲུན་གྱི་བྲེལ་ཟིང་ཁྲོད་ཡོད་པའི་གྲོང་སྡེ་ཆུང་ཆུང་ཞིག་[3]བདམས་ཡོད་པས། ས་ཆ་དེའི་འཛུགས་སྐྲུན་གྱི་སྐད་ཅོར་དང་ཟང་ཟིང་གི་རྣམ་པ་དེ་ག་རང་གིས། གློག་བརྙན་ལྟ་མཁན་ཚོར་གྲོང་སྡེ་ཆུང་ཆུང་དེར་འཕོ་འགྱུར་ཤུགས་ཆེན་པོ་འགྲོ་བཞིན་པ་རང་བཞིན་གྱིས་ཚོར་ཐུབ། དེ་ག་ནང་བཞིན་གློག་བརྙན་ << ཁྱི་རྒན >> གྱི་མཐའ་མའི་མཇུག་བསྡུ་སྟངས་མ་འདྲ་བ་གཉིས་ཡོད་པ་ནི། རྒྱལ་སྤྱིར་འགྲེམས་སྤེལ་བྱས་པའི་པར་གཞིའི་ནང་ཁྱི་རྒན་གྱི་བདག་པོ་ཕ་རྒན་དེ་ཡིས་རང་གི་སྒོ་ཁྱི་རྐུན་མས་འཁྱེར་དོགས་དང་ཁྱི་ཚོང་རྒྱག་མཁན་ཚོའི་ལག་ཏུ་མི་ཤོར་ཆེད། མཐའ་མར་ཁྱི་རྒན་བསད་པའི་རྣམ་པ་དེ་གསལ་པོར་བསྟན་ཡོད་ཅིང་། རྒྱ་ནག་ནང་འགྲེམས་སྤེལ་བྱས་པའི་གློག་བརྙན་དེའི་ནང་རྒྱ་གཞུང་གི་བཀོད་མངགས་གཞིར་བཟུང་། རྒད་པོས་ཁྱི་རྒན་མ་གསད་པའི་རྣམ་པ་ཞིག་བསྟན་ཡོད། << ཁྱི་རྒན >> འགྲེམས་སྤེལ་བྱས་རྗེས། གློག་བརྙན་གཟེངས་བསྟོད་ཀྱི་བྱ་དགའ་ཐེངས་མང་ཐོབ་ཡོད་དེ། ཀྲོག་ཡོ་རྒྱལ་སྤྱིའི་གློག་བརྙན་དུས་སྟོན་(Tokyo Future International Film Festival ) སྐབས་ཕུལ་བྱུང་གློག་བརྙན་གྱི་བྱ་དགའ་དང་། བུ་རུག་ལིན་གློག་བརྙན་དུས་སྟོན་ལ་ (Brooklyn Film Festival ) ཡུལ་ལུང་སོ་སོའི་སྐད་ནང་ཡོད་པའི་གློག་བརྙན་རྩེ་གྲས་ཀྱི་བྱ་དགའ་ཐོབ་ཡོད་པ་རེད།
གློག་བརྙན་དེ། བོད་ནང་གི་གཞས་མ་སྐད་གྲགས་ཅན་གཡང་ཕྱུག་མཚོ་དང་། བོད་ཀྱི་དགོད་བྲོའི་གཏམ་བཤད་པ་དང་སྙན་ངག་པ་ཞི་བདེ་ཉི་མ་གཉིས་ཀྱིས་གཙོ་འཁྲབ་དང་གཞས་མ་གཡང་ཕྱུག་མཚོ་ལྟ་བུར་མཚོན་ན། ཁོ་མོས་དེ་སྔོན་པད་མ་ཚེ་བརྟན་གྱི་གློག་བརྙན་<< ལྷིང་འཇགས་ཀྱི་མ་ཎི་རྡོ་འབུམ >> ནང་འཁྲབ་སྟོན་པའི་ཆ་ཤས་ཆུང་ངུ་ཞིག་ལེན་ཐུབ་པ་བྱུང་ཡོད། ༢༠༡༥ ལོར། པད་མ་ཚེ་བརྟན་ལགས་ཀྱིས་གློག་བརྙན་ཐར་ལོའི་བུད་མེད་གཙོ་འཁྲབ་པའི་མི་སྣ་འཚོལ་སྡུད་བྱེད་བཞིན་པའི་སྒང་ལ་ཡིན་དུས། པེ་ཅིང་དུ་ཁོང་དང་གཡང་ཕྱུག་མཚོ་གཉིས་ཕན་ཚུན་ཐུག་འཕྲད་བྱུང་ཡོད། སྐབས་དེར་ཁོང་གིས་གློག་བརྙན་དེའི་ཆེད་དུ་གཡང་ཕྱུག་མཚོའི་ད་ལྟའི་གཟུགས་པོ་སྐམ་དྲགས་ཡོད་པའི་བསམ་ཚུལ་ཐད་ཀར་བརྗོད་ཡོད་པ་དང་། ཁོ་མོས་ཀྱང་གནད་དོན་དེ་ཚོར་བསམ་ཤེས་ཀྱིས་ཐར་ལོའི་འཁྲབ་གཞུང་ལ་ཐེངས་གཅིག་བལྟ་རྒྱུའི་རེ་སྐུལ་ཞུས་ཡོད། རྗེས་སོར་ཁོང་གཉིས་ཡང་བསྐྱར་གནམ་ཐང་དུ་ཐུག་འཕྲད་བྱུང་ནས་སྟེས་དབང་གིས་གནམ་གྲུའི་འདུག་གྲལ་ཡང་གཅིག་པ་འཁེལ་བས། ཁོང་གཉིས་ཀྱིས་ཆུ་ཚོད་གཉིས་རིང་གློག་བརྙན་ཐར་ལོའི་བུད་མེད་གཙོ་འཁྲབ་པའི་སྣང་བརྙན་དང་འབྲེལ་བའི་སྐོར་གྲོས་བསྡུར་བྱས་ཡོད་པ་དང་། གཡང་ཕྱུག་མཚོས་གློག་བརྙན་ཐར་ལོའི་བུད་མེད་གཙོ་འཁྲབ་པའི་མི་སྣར་ཞུགས་འདོད་ཀྱིས་རྗེས་སོར་ཁོ་མོས་གཟུགས་པོའི་ལྗི་ཚད་ཇེ་ཆེར་གཏང་རྒྱུའི་ཆོད་སེམས་དང་འབྲེལ་ནས། ཁོང་ལ་བོད་མོ་འཁྲབ་སྟོན་པ་གཞན་གཉིས་ཀྱང་མཚམས་སྦྱོར་ཞུས་ཡོད། ཁོང་གཉིས་ཐུག་འཕྲད་བྱས་ཚར་བའི་ཉིན་འགའ་ཞིག་གི་རྗེས། པད་མ་ཚེ་བརྟན་ལགས་ནས་གློག་བརྙན་ཐར་ལོའི་བུད་མེད་གཙོ་འཁྲབ་པའི་སྔོན་འགྲོའི་འོས་མིའི་ནང་གཡང་ཕྱུག་མཚོ་འབོད་འགུག་གིས་མཐར་ཐར་ལོའི་བུད་མེད་གཙོ་འཁྲབ་པའི་ཆ་ཤས་དེ་ཁོ་མོར་ཕུལ་ཡོད།
གློག་བརྙན་དེ་རྒྱལ་ཕྱི་ནང་གཉིས་ཆར་འགྲེམས་སྤེལ་བྱས་པ་ནས་བཟུང་རྒྱལ་སྤྱིའི་གློག་བརྙན་གྱི་དུས་སྟོན་མང་པོའི་བྱ་དགའི་འོས་གཞིའི་ནང་འདེམས་སྒྲུག་དང་ཕུལ་བྱུང་བརྩམས་ཆོས་ཀྱི་བྱ་དགའ་ཡང་འགའ་ཞིག་ཐོབ་ཡོད་པ་ནི། ཨེ་ཤ་ཡའི་རྒྱལ་སྤྱིའི་གློག་བརྙན་དུས་སྟོན་ཐེངས་ཉི་ཤུ་རྩ་གཉིས་པའི་ ( Twenty-second Visual Asia International Film Festival ) སྟེང་ནས་ཡུལ་ལུང་སོ་སོའི་སྐད་ཀྱི་གློག་བརྙན་བྱ་དགའ་ ( Paris Oriental Language Award ) དང་ཀྲོག་ཡོ་ཕི་ལིམ་མེག་སི་(Tokyo Filmex) ཞེས་པའི་རྒྱལ་སྤྱིའི་གློག་བརྙན་དུས་སྟོན་སྐབས་བཅུ་དྲུག་པར་གློག་བརྙན་རྩེ་ཕུད་ཀྱི་བྱ་དགའ། སྐབས་ང་གཉིས་པའི་ཐེ་ལྦན་གསེར་གྱི་གྱི་ལིང་རྟགས་མའི་གློག་བརྙན་དུས་སྟོན་ལ་འཁྲབ་གཞུང་བཅོས་སྒྲིག་(Adapted Screenplay) རྩེ་ཕུད་ཀྱི་བྱ་དགའ་ཐོབ་ཡོད།
སོ་སོ་བོད་པ་ཞིག་དང་དམིགས་བསལ་རྒྱ་ནག་ནང་གི་གྲངས་ཉུང་མི་རིགས་ཀྱི་སྒྱུ་རྩལ་བ་ཞིག་ཆགས་ཀྱི་ཡོད་སྟབས། པད་མ་ཚེ་བརྟན་གྱི་གློག་བརྙན་ལ་འཛམ་གླིང་ཁྱོན་ཡོངས་ནས་དོ་སྣང་བྱེད་མཁན་ཇེ་ཆེར་འགྲོ་གི་ཡོད་པ་དང་བསྟུན་ནས། ཁོང་ལ་རྒྱ་གཞུང་དབང་འཛིན་པའི་ཕྱོགས་ནས་དཀའ་ངལ་ཅི་རིགས་འཕྲད་རྒྱུ་ཡིན་པ་ནི་ལྡོག་ཐབས་མེད་དེ། སྤྱི་ལོ་ ༢༠༡༦ ལོའི་ཟླ་དྲུག་པའི་ཚེས་ཉེར་ལྔ་ཉིན་པད་མ་ཚེ་བརྟན་ལགས་པེ་ཅིང་ནས་ཟི་ལིང་ལ་འགྲུལ་བཞུད་བྱས་ཚར་རྗེས། ཟི་ལིང་གནམ་ཐང་གི་ཕྱིར་ཐོན་ཚོགས་ཁང་ནང་དུ་ལུས་པའི་རང་གི་ཅ་ལག་ལེན་པར་ཡང་བསྐྱར་འགྲོ་དུས། གནམ་ཐང་གི་འབྲེལ་ཡོད་ཉེན་རྟོག་པས་ ‘ སྤྱི་ཚོགས་ཀྱི་བདེ་འཇགས་དཀྲུགས་པའི་’ ཉེས་མིང་འོག་ཁོ་པ་འཛིན་བཟུང་གིས་སྐྲ་ནས་འཐེན་པ་དང་རྡུང་རྡེག་བྱས་པའི་རྨ་ཤུལ་ཡང་མཐོང་རྒྱུ་ཡོད་ལ། ཕྱི་ཚེས་ ༢༦ གི་དགོང་མོར་ཉེན་རྟོག་པས་ཚ་འདྲི་བྱས་པའི་བརྒྱུད་རིམ་ཁྲོད་པད་མ་ཚེ་བརྟན་ལགས་མགོ་ཡུ་འཁོར་བ་དང་བྲག་ཁོག་བསྡམས་པ། ལག་པའི་མཛུབ་མོ་རྣམས་སྦྲིད་པ་སོགས་ཀྱི་རྐྱེན་ལ་བརྟེན་ནས། ཕྱི་ཚེས་ ༢༧ གྱི་ཉིན་རྒྱབ་ཙམ་ལ་ཁོང་སྨན་ཁང་དུ་འཁྲིད་དགོས་བྱུང་ཡོད། གནམ་ཐང་གི་དོན་རྐྱེན་དེས་པད་མ་ཚེ་བརྟན་གྱི་མ་འོངས་མདུན་ལམ་ལ་གནོད་སྐྱོན་ཆེན་པོ་བཟོས་ཡོད་པ་ཁོང་གིས་དེ་སྔ་གྲོགས་པོ་ཚོར་གསུངས་མྱོང་ཡོད་པ་ནི། དཔེར་ན། གནས་ཚུལ་དེ་བྱུང་ཚར་བའི་རྗེས། དེ་སྔོན་ཧོང་ཀོང་མཐོ་སློབ་ཅིག་གིས་ཁོ་པར་དགེ་རྒན་ཆེན་མོའི་ས་མིག་ཅིག་མཁོ་འདོན་བྱས་ཡོད་པ་དེ་ཕྱིར་འཐེན་བྱས་ཡོད། འོན་ཀྱང་གནད་དོན་དེ་རྒྱ་ནག་གཞུང་གི་གནོན་ཤུགས་ཀྱི་རྐྱེན་གྱིས་ཡིན་ནམ་ཡང་ན་མཐོ་སློབ་རང་གིས་གནས་ཚུལ་དེ་རྐྱེན་ལ་བརྟེན་ནས་ཕྱིར་འཐེན་བྱས་ཡོད་མེད་ཀྱི་ཁ་ཚོན་གཅོད་དཀའ་ནའང་། གང་ལྟར། རྗེས་སོར་པད་མ་ཚེ་བརྟན་གྱིས་གནད་དོན་དེ་དང་འབྲེལ་བའི་ཉེན་རྟོག་པ་ཚོས་ཁོང་ལ་མཚན་ཤས་བཟོས་པའི་ཉེས་མིང་འོག་ཁྲིམས་གཏུགས་བྱས་ཡོད་ཀྱང་། ཁྲིམས་ཁང་ནས་ཉེན་རྟོག་པ་ཚོས་ཁོང་ལ་དགོངས་སེལ་ཞུ་དགོས་པའི་ཁྲིམས་གཅོད་སོགས་གང་ཡང་བྱས་མེད། གནད་དོན་དེ་བྱུང་ཚར་བའི་རྗེས་འབྲེལ་ཡོད་དབང་འཛིན་པ་ཚོས། རྒན་ཡོལ་ཞུས་ཟིན་པའི་བོད་མི་ཉེན་རྟོག་པ་ཞིག་ཁོང་སར་བཏང་ནས་ཁྲིམས་གཏུགས་ཕྱིར་འཐེན་བྱེད་དགོས་པར་མངགས་ནའང་། པད་མ་ཚེ་བརྟན་ལགས་ནས་ཁྲིམས་གཏུགས་ཕྱིར་འཐེན་བྱས་མེད་ལ་གནད་དོན་དེ་ད་ལྟའང་ཐག་མ་བཅད་པར་ལྷག་ཡོད། གོང་གི་འབྱུང་རྐྱེན་དེ་ཚོ་དང་འབྲེལ་བའི་གནས་ཚུལ་ཆ་ཚང་ཞིག་རྗེས་སོར་ཁོང་གིས་ཐོ་འགོད་བྱས་ཡོད་ཅིང་ཟིན་བྲིས་དེ་ད་ལྟའང་ཕྱི་ལ་བཏོན་མེད།
༢༠༡༨ ལོར་པད་མ་ཚེ་བརྟན་ལགས་ཀྱིས་བཟོས་པའི་གློག་བརྙན་ << ལག་དམར >> ཞེས་པ་ནི་དབུས་ཁུལ་གྱི་སྒྲུང་གཏམ་པ་གྲགས་ཅན་ཚེ་རིང་ནོར་བུ་ཡི་སྒྲུང་ཐུང་<< ལག་དམར >> ཞེས་པ་ཞིག་དང་པད་མ་ཚེ་བརྟན་ཁོང་རང་གི་སྒྲུང་ཐུང་<< ལུག་གཅིག་བསད་པ >> ཞེས་པ་གཉིས་ལས་བཅོས་སྒྲིག་བྱས་ཡོད། གློག་བརྙན་དེའི་གཏམ་རྒྱུད་ཧྲིལ་པོ་དོས་སྐྱེལ་ཁ་ལོ་བ་སྦྱིན་པ་ཟེར་བ་ཞིག་ཨ་ཆེན་གངས་རྒྱབ་ཀྱི་མི་མེད་ལུང་སྟོང་ཞིག་ཏུ་ཁེར་བགྲོད་བྱེད་བཞིན་པའི་བར་གླགས་དེར། གློ་བུར་དུ་མ་བསམ་ས་ནས་ཁོའི་རླངས་འཁོར་གྱིས་ལུག་གཅིག་བརྫིས་པའི་རྐྱེན་ངན་དེ་ལས་འགོ་བཙུགས་ཤིང་། ཅུང་མ་འགོར་བར་ཁ་ལོ་བ་སྦྱིན་པར་ཁོ་རང་དང་མིང་གཅིག་པ་ཡིན་པའི་ཁམས་པའི་ཕོ་གསར་ཞིག་ངོ་འཕྲད་བྱུང་ཡོད། སྦྱིན་པ་ཟེར་བའི་ཁམས་པའི་ཕོ་གསར་དེ་ནི། ལོ་ངོ་བཅུའི་གོང་རང་གི་ཕ་བསད་པའི་ལག་དམར་བར་ཤ་འཁོན་ལེན་ཆེད་ས་ཐག་རིང་པོ་ནས་སླེབས་ཡོད། གློག་བརྙན་འདིའི་ནང་ཁོང་གཉིས་ཀྱི་འགྲུལ་བཞུད་མི་འདྲ་ནའང་། མིང་གཅིག་པ་ཡིན་པའི་མི་དེ་གཉིས་ལ་ཐུན་མོང་གི་འབྲེལ་བ་ཞིག་ཡོད་པ་ཁ་ལོ་བ་སྦྱིན་པའི་སེམས་ནང་ཡང་ཡང་འཁོར་བས། ཁོས་ཆོད་སེམས་བརྟན་པོས་ཕ་བསད་པའི་ཤ་འཁོན་རྩོད་པར་འགྲོ་བཞིན་པའི་སྦྱིན་པ་གཞན་དེ་རྩད་འཚོལ་དང་འབྲེལ་བའི་གཏམ་རྒྱུད་ཅིག་གསལ་སྟོན་བྱས་ཡོད། གློག་བརྙན་དེའི་ནང་། པད་མ་ཚེ་བརྟན་གྱིས་ལྟད་མོ་བ་ཚོར་ཆོས་ལུགས་ཀྱི་འདུ་ཤེས་དང་། ཀུན་སྤྱོད། དངོས་ཡོད་གནས་སྟངས་སོགས་མང་པོ་ཞིག་ལ་བསྐྱར་ཞིབ་བྱེད་དགོས་པར་སྐུལ་མ་བཏང་ཡོད་པ་དང་། དམིགས་བསལ་ཁོང་གིས་གློག་བརྙན་དེའི་དངོས་ཡོད་དང་དྲན་པ། རྨི་ལམ་མཚོན་བྱེད་ཀྱི་བརྙན་རིས་ཚོན་མདོག་མ་འདྲ་བ་གསུམ་སྤྱད་ཡོད།
གློག་བརྙན་ << ལག་དམར >> ལྟ་བུར་མཚོན་ན། དེའི་འཁྲབ་སྟོན་པའི་མི་སྣ་གཙོ་བོ་གསུམ་པད་མ་ཚེ་བརྟན་གྱིས་བོད་ཁུལ་གྱི་ས་ཁུལ་འདྲ་མིན་ནས་འདེམས་སྒྲུག་བྱས་ཡོད། དཔེར་ན། བསོད་ནམས་དབང་མོ་ནི་ལྷ་ས་ནས་ཡིན་པ་དང་། སྦྱིན་པ་ནི་ཨ་མདོ་དང་། དགེ་འདུན་ཕུན་ཚོགས་ནི་ཁམས་ཁུལ་ནས་ཡིན། གློག་བརྙན་དེའི་གཙོ་འཁྲབ་པ་བསོད་ནམས་དབང་མོ་དང་སྦྱིན་པ་གཉིས་ནི་ཁམས་ཁུལ་གྱི་མི་སྣའི་འཐུབ་ཚབ་ཅིག་ཆགས་ཀྱི་ཡོད་དུས། ནམ་རྒྱུན་གློག་བརྙན་གྱི་སྐད་སྦྱོར་བྱེད་མཁན་ཆེད་ལས་པ་གླ་སྲོལ་ཡོད་པ་དེ་འདྲར་བརྟེན་མི་དགོས་པར། ཁོང་གཉིས་ནས་དུས་ཡུན་གང་ཙམ་རིང་ཁམས་སྐད་སྦྱོང་བརྡར་བྱས་ཡོད། སྦྱིན་པ་ལྟ་བུར་མཚོན་ན། གློག་བརྙན་འདིའི་ནང་ཁ་ལོ་བ་ཞིག་གཙོ་འཁྲབ་བྱས་ཡོད་པས། ཁོས་གློག་བརྙན་ནང་གི་ཁ་ལོ་བ་ཞིག་གི་ཡིད་བརྙན་གསལ་པོ་འདོན་ཐབས་སུ་བོད་ཁུལ་གྱི་སྒང་གཤོང་འདྲ་མིན་དུ་རླངས་འཁོར་བསྐོར་ནས་ཁ་ལོ་བ་ཞིག་གི་མི་ཚེ་ལ་རྒྱུས་ལོན་བྱས་ཡོད། དེ་ག་ནང་བཞིན་དགེ་འདུན་ཕུན་ཚོགས་ནས་ཀྱང་སོ་སོའི་འཁྲབ་ཚན་དེའི་ཆེད་སྤྲང་པོ་ཞིག་གི་རྣམ་པར་རྫུས་ཏེ་ཉིན་གྲངས་མང་པོར་གྲོང་གསེབ་འདྲ་མིན་དུ་འཁྱམ་ཉུལ་གྱིས་རང་ཁྱིམ་མེད་པའི་མི་ཞིག་གི་འཚོ་བར་ཉམས་ཚོད་ལེན་ཐབས་བྱས་ཡོད། དམིགས་བསལ་ཞུ་རྒྱུ་ཞིག་ལ། གློག་བརྙན་དེར་ཇ་ཁང་ཞིག་གི་ནང་ཁ་ལོ་བ་སྦྱིན་པས་མོག་མོག་ཟ་བཞིན་པའི་འཁྲབ་ཚན་ཞིག་ཡོད་དུས། བརྙན་རིས་དེ་འཁྲབ་ཁྲིད་པའི་འདོད་བློ་ནང་བཞིན་ཡོང་བ་ཁོ་ནའི་ཆེད་ཁ་ལོ་བ་སྦྱིན་པ་གཙོ་འཁྲབ་པ་ཁོང་གིས་མོག་མོག་བཞི་བཅུ་ཞེ་ལྔ་བཟའ་དགོས་བྱུང་ཡོད། གློག་བརྙན་ << ལག་དམར >> ལ་རྒྱལ་སྤྱིའི་གློག་བརྙན་གྱི་དུས་སྟོན་མང་པོའི་ཚན་པ་སོ་སོའི་བྱ་དགའི་འོས་མིང་ནང་ཚུད་ཐུབ་པ་བྱུང་ཡོད་ལ། ལྦེ་ནི་སི་རྒྱལ་སྤྱིའི་གློག་བརྙན་གྱི་དུས་སྟོན་( Venice International Film Festival ) སྐབས་དོན་ལྔར་འཁྲབ་གཞུང་རྩེ་ཕུད་( Best Screenplay) ཀྱི་བྱ་དགའ་ཐོབ་ཡོད་པ་རེད།
དངོས་གནས་བྱས་ན། པད་མ་ཚེ་བརྟན་ལགས་ཀྱིས་གློག་བརྙན་<< དབུགས་ལྒང >> གི་འཁྲབ་གཞུང་ ༢༠༡༢ ཚུན་ཆད་ནས་བྲིས་ཚར་ནའང་དེར་གཞུང་ཕྱོགས་ཀྱི་ཆོག་མཆན་ཐོབ་པར་དུས་ཡུན་གང་ཙམ་འགོར་ཡོད། གློག་བརྙན་དེའི་ཐོག་མའི་འཁྲབ་གཞུང་གི་ནང་དུ་བུད་མེད་འཁྲབ་སྟོན་པ་གཉིས་ཆར་ཆ་ཤས་གཅིག་མཚུངས་བཞག་ཡོད་ལ། དམིགས་བསལ་གཞས་མ་གཡང་ཕྱུག་མཚོས་གཙོ་འཁྲབ་བྱས་པའི་ཇོ་མོ་བྱང་ཆུབ་སྒྲོལ་མ་ཞེས་པ་དེ་པད་མ་ཚེ་བརྟན་གྱིས་བུད་མེད་འཁྲབ་སྟོན་པའི་མི་སྣ་གཙོ་བོར་བདམས་ཡོད་སྟབས། གློག་བརྙན་དེའི་གཏམ་རྒྱུད་ཧྲིལ་བོ་ཁོ་མོ་དགོན་པ་ནས་ཕྱིར་ཁྱིམ་དུ་ལོག་པའི་ལམ་བར་ནས་མོ་རང་ལ་ནང་མི་ཡི་དཀའ་ངལ་དང་གནད་དོན་གཞན་མང་པོ་ཞིག་གིས་དཀའ་ཚེགས་ལ་གཏད་པའི་རྣམ་པ་དག་བཀོད་ནས། ཨ་ནེ་བྱང་ཆུབ་སྒྲོལ་མས་ཟློག་ཏུ་མེད་པའི་འཇིག་རྟེན་འཁོར་བའི་ཆོས་ཉིད་ལ་ངེས་ཤེས་སྐྱེས་པའི་ཚུལ་རྣམས་གསལ་པོར་བཀོད་ཡོད་ལ། པད་མ་ཚེ་བརྟན་ཁོ་རང་གིས་ཀྱང་གཡང་ཕྱུག་མཚོར་དགོན་པའི་ནང་ཟླ་བ་གང་འཚམ་རིང་བསྡད་ནས་ཇོ་མོའི་འཚོ་བ་སྐྱེལ་སྟངས་ལ་རྒྱུས་ལོན་བྱ་དགོས་པར་སྐུལ་འདེད་བྱས་ཡོད། འོན་ཀྱང་། རྗེས་སོར་འཁྲབ་གཞུང་དེར་བསྐྱར་བཅོས་ཐེངས་མང་བྱས་པའི་རྐྱེན་གྱིས་དངོས་གཞིའི་གློག་བརྙན་ནང་ཇོ་མོའི་འཁྲབ་ཚན་དེ་ཇེ་ཐུང་དུ་གཏོང་དགོས་བྱུང་ཡོད། གློག་བརྙན་ << དབུགས་ལྒང >> རྒྱལ་སྤྱིའི་གློག་བརྙན་གྱི་དུས་སྟོན་མང་པོའི་བྱ་དགའི་འོས་གཞིའི་ནང་འདེམས་སྒྲུག་དང་། ཅི་ཀ་ཀོ་རྒྱལ་སྤྱིའི་གློག་བརྙན་དུས་སྟོན་སྐབས་ལྔ་པ་(Chicago International Film Festival ) དང་ཀྲོག་ཡོ་ཕི་ལིམ་མེག་སི་(Tokyo Filmex) རྒྱལ་སྤྱིའི་གློག་བརྙན་དུས་སྟོན་སྐབས་ཉི་ཤུ་པའི་སྟེང་ནས་འཁྲབ་གཞུང་རྩེ་ཕུད་ཀྱི་བྱ་དགའ་ཐོབ་ཡོད།
གློག་བརྙན་བཟོ་སྐྲུན་གྱི་ལས་ལ་ཞུགས་པའི་ལོ་ངོ་ཉི་ཤུ་ལྷག་གི་དུས་ཡུན་ནང་། པད་མ་ཚེ་བརྟན་ལགས་ཀྱིས་གློག་བརྙན་ཉི་ཤུ་ལྷག་ཕབ་སྐྲུན་བྱས་ཡོད་པ་དང་། དེའི་ནང་ནས་གློག་བརྙན་ << ཀ་ཐོག་སྨོན་ལམ་ཆེན་མོ – ༢༠༠༧ >> དང་ << བསམ་ཡས་དགོན – ༢༠༠༧ >> << གཡང་མདའ – ༢༠༡༤ >> སོགས་ནི་གཞུང་ཕྱོགས་ཀྱིས་མ་དངུལ་རྒྱབ་སྐྱོར་འོག་ཕབ་སྐྲུན་བྱས་ཡོད་ཅིང་། གློག་བརྙན་དེ་དག་རྒྱ་ནག་ནང་དར་རྒྱུག་ཆེ་བའི་དྲ་ཚིགས་ཁག་སོ་སོ་ནས་བལྟ་ཐུབ།
ཁོང་གི་བྱས་རྗེས་དང་འདས་གྲོངས་སུ་ཕྱིན་པའི་བརྒྱུད་རིམ།
སྤྱི་ལོ་ ༢༠༢༣ ལོའི་ཟླ་ ༥ པའི་ཚེས་ ༡ ཉིན། པད་མ་ཚེ་བརྟན་ལགས་ལྷ་སར་རྡོག་ཐོན་གྱིས་དམིགས་བསལ་ཡར་འབྲོག་གཡུ་མཚོའི་ཉེ་འགྲམ་གྱི་རྒྱ་མཚོ་ངོས་ལས་མཐོ་ཚད་སྨི་ ༤༤༥༠ ཡོད་པའི་སྣ་དཀར་རྩེ་རྫོང་དུ་རང་གི་བུ་འཇིགས་མེད་འཕྲིན་ལས་ཀྱིས་ཕབ་སྐྲུན་བྱེད་བཞིན་པའི་གློག་བརྙན་ << ལས་དང་ལམ >> ལ་རྟོག་ཞིབ་དང་རོགས་དན་གྱི་ཆེད་དུ་སླེབས་ཡོད་ཅིང་། དེ་ཡང་ཕྱོགས་གཅིག་ནས་པད་མ་ཚེ་བརྟན་ལགས་ནི། གློག་བརྙན་གང་དེའི་འཁྲབ་གཞུང་རྩོམ་པ་པོ་དང་བློ་འདྲི་ཡུལ་དུ་གྱུར་ཡོད། ད་རེས་ཀྱི་འགྲིམ་འགྲུལ་འདིར་ཁོང་གི་རྒྱུན་ལྡན་ཕྱག་རོགས་དང་དམིགས་བསལ་དུས་རྒྱུན་ཁོང་གི་འཕྲོད་བསྟེན་དང་སྨན་བཅོས་ཀྱི་དགོས་མཁོ་སོགས་ལ་ལྟ་རྟོག་བྱེད་མཁན་རང་གི་ཚ་བོ་སོགས་སུ་གང་ཡང་མཉམ་དུ་མེད་པར་ཁོ་རང་གཅིག་པུས་འགྲུལ་བཞུད་བྱས་ཡོད།
གློག་བརྙན་<< ལས་དང་ལམ >> གྱི་ཕབ་སྐྲུན་པའི་ཚོགས་མི་བརྒྱ་དང་སུམ་ཅུ་ཙམ་ཡོད་པ་དང་ཁོ་ཚོའི་བརྙན་ཕབ་ལེན་ཡུལ་གྱི་གྲོང་ཚོ་དེ་ཡང་ཆུང་ཆུང་ཞིག་ཡིན་དུས། གློག་བརྙན་གྱི་ལས་མི་ཕལ་ཆེ་བ་མགྲོན་ཁང་སོ་སོར་ཁ་འཐོར་ནས་བསྡད་ཡོད། སྤྱི་ཟླ་ ༥ པའི་ཚེས་ ༧ གྱི་དགོང་མོར་པད་མ་ཚེ་བརྟན་ལགས་ཤིན་ཧུའུ་མགྲོན་ཁང་གི་ཐོག་བརྩེགས་གསུམ་པར་བསྡད་ཡོད་པ་དང་། དུས་རྒྱུན་ས་མཐོ་སར་གློག་བརྙན་ཕབ་སྐྲུན་བྱེད་སྐབས་ལས་མི་ཚང་མར་འཚོ་རླུང་(Oxygen) རེ་སྤྲོད་སྲོལ་ཡོད་ནའང་སྐབས་དེར་ཁོང་ལ་བྱུང་མེད། འབྲེལ་ཡོད་མི་སྐོར་ཞིག་གིས་བཤད་པ་ལྟར་ན། མཚན་མོ་དེར་ཁོའི་ཉལ་ཁང་གི་དྲོད་ཚད་ཀྱང་ནམ་རྒྱུན་དང་མ་འདྲ་བར་ཧ་ཅང་མཐོ་པོ་ཡོད་པར་བརྗོད་ཡོད།
ཉིན་དེའི་མཚན་ཡོལ་ཆུ་ཚོད་ ༣ཿ ༡༦ ཙམ་ལ་པད་མ་ཚེ་བརྟན་ལགས་གཟུགས་གཞི་བདེ་བོ་མ་བྱུང་བའི་རྐྱེན་གྱིས། མགྲོན་ཁང་གཞན་ཞིག་གི་ནང་བསྡད་ཡོད་པའི་རང་གི་གྲོགས་པོ་ཚེ་མདོ་ལ་ཁ་པར་བརྒྱུད་ཁོང་སར་ཡོང་དགོས་པར་མངགས་ཤིང་། ཚེ་མདོས་བྲེལ་འཚུབ་ངང་པད་མ་ཚེ་བརྟན་ལགས་བཞུགས་སའི་མགྲོན་ཁང་དུ་སོང་རྗེས། ཁོང་གཉིས་ནས་མོ་ཊ་ཞིག་གླས་ཏེ་ས་ཁུལ་དེའི་ཉེ་འགྲམ་གྱི་སྨན་ཁང་ཞིག་ཏུ་ཕྱིན་ཡོད། ཆུ་ཚོད་༣ཿ ༣༩ གཡས་གཡོན་ཙམ་ཞིག་ལ་ཁོང་གཉིས་སྨན་ཁང་ལ་སླེབས་དུས། པད་མ་ཚེ་བརྟན་ནས་རང་འགུལ་གྱིས་གོམ་པ་འགའ་སྤོས་རྗེས་གློ་བུར་དུ་བསྐྱུགས་ཏེ་སར་འགྱེལ་བས། ཚེ་མདོས་རང་ནུས་གང་ཡོད་སྒོས་ཁོང་ལ་ཕྱག་རོགས་ཞུ་རྒྱུའི་འབད་པ་དེ་ཡང་བེད་མེད་དུ་སོང་། སྐབས་དེར། མོ་ཊའི་ཁ་ལོ་བ་དང་རོགས་པ་གཞན་ཞིག་གིས་པད་མ་ཚེ་བརྟན་ལགས་སྨན་ཁང་གི་མྱུར་སྐྱོབ་ཁང་དུ་འཁྲིད་ནའང་། སྟབས་མ་ལེགས་པ་ཞིག་ལ་ཁོང་སྔ་ས་ནས་ཚེ་ལས་འདས་ཟིན་ཡོད། ཤེས་རྟོགས་བྱུང་བ་ལྟར་ན། ཁོང་ལ་སྙིང་ནད་ཀྱིས་རྐྱེན་པས་འདས་གྲོངས་སུ་ཕྱིན་ཡོད་པ་བརྗོད་ཡོད།
པད་མ་ཚེ་བརྟན་ལགས་སྔ་ས་ནས་འདས་ཟིན་ཡོད་ལ་ཁོང་ལ་ཕྱག་རོགས་ཞུ་མཁན་གྱི་གྲོགས་པོ་ཚོས་ཀྱང་བྱ་ཐབས་གང་ཡང་མེད་པ་ཤེས་ཀྱི་ཡོད། འོན་ཀྱང་། ཁོ་ཚོས་ད་དུང་ཡང་སེམས་ཤུགས་མ་ཆག་པར་པད་མ་ཚེ་བརྟན་ལགས་ཐད་འཕུར་གནམ་གྲུ་བརྒྱུད་ལྷ་སར་འཁྲིད་རྒྱུའི་གྲོས་བྱས་པ་དང་དེ་མ་བྱུང་བས། ཁོང་སྨན་ཁང་གི་མྱུར་སྐྱོབ་རླངས་འཁོར་ནང་བཞག་ནས་མཐར་ཞོགས་པའི་ཚོུད་ ༧ཿ ༥༧ ལ་ཁོ་ཚོ་བོད་ལྗོངས་མི་དམངས་སྨན་ཁང་དུ་འབྱོར་ཐུབ་པ་བྱུང་ཡོད། དེར་ཆེད་ལས་སྨན་པ་རྣམས་ཀྱིས་བརྟག་དཔྱད་བྱས་ཚར་རྗེས། ཁོང་སྔ་ས་ནས་ཚེ་ལས་འདས་ཟིན་པ་བརྗོད་ཡོད་པས། མཐར་ཁོང་གི་སྐུ་ཕུང་ལྷ་སར་ཡོད་པའི་པད་མ་ཚེ་བརྟན་ལགས་ཀྱི་གྲོགས་པོ་ཚེ་རིང་རྒྱལ་གྱི་ནང་དུ་གདན་འདྲེན་ཞུས་ཤིང་། སྲོལ་རྒྱུན་ལྟར་དམ་པ་ཁོང་ལ་སྨོན་ལམ་དང་འདས་མཆོད་བསྒྲུབས་ཡོད།
ཟླ་བ་ ༥ པའི་ཚེས་ ༡༠ ཉིན་གྱི་ཞོགས་པའི་ཚོུད་ ༤:༣༠ ལ་པད་མ་ཚེ་བརྟན་ལགས་ཀྱི་སྐུ་ཕུང་མི་གྲངས་ཉིས་བརྒྱ་ལྷག་ཙམ་གྱི་སྨོན་འདུན་དང་ཆེས་མཐའ་མའི་གྱེས་ཕྱག་གི་ཁྲོད་ནས་ལྷ་སའི་གཙུག་ལག་ཁང་ལ་སྐོར་བ་ལན་གཅིག་བསྐོར་ཏེ། ཐད་ཀར་སྟོད་ལུང་རིན་ཆེན་སྒང་གི་དུར་ཁྲོད་དུ་གདན་འདྲེན་ཞུས་ཡོད། ཚེས་ ༡༠ ཡི་ཉིན་རྒྱབ་ཙམ་ལ་ཁོང་གི་བུ་འཇིགས་མེད་འཕྲིན་ལས་དང་གྲོགས་པོ་ཚོས་པད་མ་ཚེ་བརྟན་ལགས་ཀྱི་རུས་ཐལ་ཁོང་གི་འཁྲུངས་ཡུལ་ཨ་མདོ་ཁྲི་ཀར་གདན་འདྲེན་ཞུས་ཡོད་པ་རེད།
ཁོང་འདས་གྲོངས་སུ་གྱུར་རྗེས། རྒྱལ་ཕྱི་ནང་གི་མི་ཚོགས་མང་པོས་ཁོང་ལ་མྱ་ངན་དང་དམིགས་བསལ་བོད་ནང་ལོགས་ཙམ་མ་ཡིན་པར་ནེའུ་ཡོག་དང་རྡ་རམ་ས་ལར་ཁོང་གི་དགོངས་ཞག་ཞེ་དགུ་ལོན་པའི་རྗེས་དྲན་ཚོགས་འདུ་འཚོགས་ཡོད། པད་མ་ཚེ་བརྟན་ལགས་འདས་གྲོངས་སུ་ཕྱིན་པའི་གནས་ཚུལ་དེ་ཨ་རིའི་ནེའུ་ཡོག་དུས་བབ་དང་ལོན་ཊོན་དཔལ་འབྱོར་རིག་པ་བའི་གསར་ཁང་(The Economist) ཐེ་བའི་རྒྱལ་ཕྱི་ནང་གི་གསར་ཁང་ ༢༥༠ ལྷག་ཙམ་གྱིས་གསར་འགྱུར་སྤེལ་ཡོད་པ་རེད།
[1] སྒྱུར་མཆན། རྒྱལ་སྤྱིའི་གློག་བརྙན་དུས་སྟོན་དང་གསར་ཁང་ཁག་གི་ནང་གློག་བརྙན་དེའི་མིང་ལ་ << སྦྱིན་པ >> ཞེས་བྲིས་ཡོད།
[2]སྒྱུར་མཆན། ཚན་པ་དེའི་ཁོངས་སུ། ཨེ་ཤ་ཡའི་གསར་སྐྱེས་གློག་བརྙན་འཁྲབ་ཁྲིད་པ་ཚོས་བཟོས་པའི་གཏམ་རྒྱུད་གློག་བརྙན་རྩེ་ཕུད་གཉིས་འདེམས་སྒྲུག་བྱེད་ཀྱི་ཡོད།
[3]སྒྱུར་མཆན། གྲོང་སྡེ་ཆུང་ཆུང་དེར་ད་ལྟ་ཡང་རིག་གནས་གསར་བརྗེའི་སྐབས་བསྒྱུར་བཅོས་བཏང་བའི་ས་ཁུལ་གྱི་མིང་ ‘དར་དམར་’ དང་ ‘བཅིངས་གྲོལ་’ སོགས་མཐོང་རྒྱུ་ཡོད།
གཡག་ཕྱུག་ཕུན་ཚོགས་ཆོས་འཕེལ་གྱིས་བསྒྱུར།
_________________________________________________
Publication of this biography was made possible through support of National Endowment for the Humanities.
Any views, findings, conclusions, or recommendations expressed do not necessarily represent those of the National Endowment for the Humanities.
Additional Bios Sponsored By National Endowment for the Humanities
དཔྱད་གཞིའི་ཡིག་ཆ་ཁག།
A khri. "Skyes mchog khong nyid/ 'di lhar glo bur bzhud song." Weixin Official Accounts Platform. Accessed July 5, 2023.
Anthropocene & Contemporary Chinese Cultures. "Tharlo: From Fiction to Film（壹貳之間：〈塔洛〉小說與電影）." October 14, 2022. Video, 1:34:32. https://www.youtube.com/watch?v=pKGrEOc810g.
Asia Society. "Filmmaker Pema Tseden: Tibetan Films for Tibetan People." May 18, 2010. Video, 10:01. https://www.youtube.com/watch?v=pYCQHuJE-bo.
Bkra, Sgar ba tshe. "Gdung ba'i khur chen de nyid spobs par skyes shog." Weixin Official Accounts Platform. Accessed July 5, 2023.
Blo bzang, interview with author, June 25, 2023.
Ching, khren, translator. "Brtsams skrung nang gi pad+ma tshe brtan." Weixin Official Accounts Platform. Accessed July 5, 2023.
Chemi Time ['chi med kyi gleng mol]."Special Feature of Film Jinpa Part I, 2019." Oct 23, 2019. Video, 25:02. https://www.youtube.com/watch?v=iCCQWOMCHfM.
Chemi Time ['chi med kyi gleng mol]."Special Feature of Film Jinpa Part II, 2019." Oct 23, 2019. Video, 25:05. https://www.youtube.com/watch?v=HbF3azu3RvA.
Dey drol, Skyabs chen. "Lhug rtsom rnying pa 'dis dam pa khong la rjes dran zhu." Weixin Official Accounts Platform. Accessed July 5, 2023.
“Filmmaker Pema Tseden.” HIST1120: At China's Edges. Accessed July 5, 2023. https://mediakron.bc.edu/edges/pema-tsedens-film-and-contested-identity/pema-tsedens-film-and-contested-identity.
Grub, tshe ring don, translator. "Snying nye ba'i pad+ma tshe brtan lags." Weixin Official Accounts Platform. Accessed July 5, 2023.
Gdugs dkar tshe ring in discussion with the author, June 26, 2023.
Lcags mo 'tsho in discussion with the author, June 24, 2023.
Mi rgod rtsom rig dra tshigs. "Khrab khrid pa grags can pad+ma tshe brtan lags dbus lha ldan du sku gshegs par mya ngan zhu." Weixin Official Accounts Platform. Accessed July 5, 2023.
Mtsho, Gyang phyug. "Gga'i sems khong gi rgan pad+ma tshe brtan." Weixin Official Accounts Platform. Accessed July 5, 2023.
Pema Bhum, interview with author, June, 26, 2023.
RADII. "Tibetan filmmaker Pema Tseden on “Balloon” and the rise of Tibetan cinema", November 19, 2020. Video, 5:01. https://www.youtube.com/watch?v=QZIIDely1Ik.
Rang sgra. "Grogs po lags / khyod da rung dpe cha len du mi yong ngam." Weixin Official Accounts Platform. Accessed June 29, 2023.
Rgyal, Dpal mkhar. "gan pad+ma lags / ngas mthong pa ni dpa' bo nam yang khyer rkyang gi mtshan gzhi yin." Weixin Official Accounts Platform. Accessed July 5, 2023.
Rgyal, Lha byams. "Ston lo ser po." bod kyi rtsom rig dra ba. Accessed July 7, 2023. https://www.tibetcm.com/contemporary/prose/2023-05-13/9223.html.
Rgyal, Lha chen. "A khu pad+ma ye / khyed med na rang sems stong ba red." Weixin Official Accounts Platform. Accessed July 5, 2023.
Ri bo che. "Pad tshe dang bod kyi glog brnyan." Weixin Official Accounts Platform. Accessed July 5, 2023.
Rin chen rdo rje in discussion with the author, June 23, 2023.
Ring, Yum tshe. "Pad tshe'i 'khun sgra la gyes phyag 'bul ba." Weixin Official Accounts Platform. Accessed June 29, 2023.
Rlung, Thor. "Rgan pad+ma tshe brtan rjes su dran pa'i gtam." Weixin Official Accounts Platform. Accessed July 6, 2023.
Rnam, Tshe. "Pad ma tshe brtan na re / ji ltar mi gshis la nye na de ltar 'dzam lging la bdag go." Tibet.cn. Accessed July 7, 2023. http://wap.tibet.cn/tb/pl/tw/201508/t20150805_3742818.html.
Rtsom pa po dra tshigs. "Pad ma tshe brtan." Writers | Rtsom pa po. Accessed July 7, 2023. https://www.tbwriters.com/?p=2661.
Shakya, Tsering. "Old Dog (khyi rgan) Directed by Pema Tsetan & The Sun-Beaten Path (dbus lam gyi nyi ma) Directed by Sonthar Gyal." Lhakhar Diaries. November 30, 2011. https://lhakardiaries.com/2011/11/30/old-dog-khyi-rgan-directed-by-pema-tsetan-the-sun-beaten-path-dbus-lam-gyi-nyi-ma-directed-by-sonthar-gyal/.
Shakya, Tsering. "The One Who Escaped." High Peaks Pure Earth. May 16, 2016. https://highpeakspureearth.com/the-one-who-escaped-tsering-shakya-reviews-pema-tsedens-film-tharlo/.
Skyabs, Gzungs dus. "Nga ni pad+ma tshe brtan la rgyang blta byed mkhan zhig yin." Writers | Rtsom pa po. Accessed July 7, 2023. https://www.tbwriters.com/?p=3575.
Sonam, Tenzing. "Quiet Storm: Pema Tseden and the Emergence of Tibetan Cinema." White Crane Films. October, 2012. https://whitecranefilms.com/writing/quiet-storm-pema-tseden-and-the-emergence-of-tibetan-cinema/.
TIFF Originals. "Balloon Director Q&A | TIFF 2019." September 10, 2019. Video, 26:24. https://www.youtube.com/watch?v=v2RSAO1btzs.
Trace Foundation. "Trace Foundation interviews director Pema Tseden." August 19, 2010. Video, 19:41.https://www.youtube.com/watch?v=hvtmMV40Jgg.
Trace Foundation. "On the Road with Pema Tseden." June 12, 2012. https://www.trace.org/profile/road-pema-tseden.
Tseden, Pema. Enticement: Stories of Tibet. Translated by Patricia Schiaffini-Vedani and Michael Monhart. Albany: State University of New York Press, 2018.
Tseden, Pema. "Interview: Pema Tseden, The Master," Phurwa Tsering and Françoise Robin, translated by Lamo Dorjee. Yeshe Journal. Accessed July 5, 2023. https://yeshe.org/pema-tseden-the-master/.
Tseden, Pema. "Pema Tseden with Lu Yangqiao." Interview by Lu Yangqiao. Brooklyn Rail, April 6, 2016. https://brooklynrail.org/2016/04/film/pema-tseden-with-lu-yangqiao.
Tseden, Pema, "Three Photographs and the Days of My Youth." Translated by Brantley Collins. Yeshe Journal. Accessed July 7, 2023. https://yeshe.org/three-photographs-and-the-days-of-my-youth/.
Ye, Yuan. "Where Next for the Filmmakers of the Tibetan New Wave?" #SixthTone. June 24, 2021. https://www.sixthtone.com/news/1007830.